月入三萬的香港人#954

http://homebloggerhk.com/38515/

 

Hello 諗sir,

本人38歲，月入33,000，

儲蓄: (股票+現金) = 450,000

每月可儲: $20,000, 沒有負債

如果現在想買新樓自住, 想請教以下問題:

1. 如果買一棟450萬新樓, 買家提供二按, 是否可以負擔? (因為我是新手, 不知道他們的優惠是如何計), 又免30個月免息免供是否優惠?

2. 因為銀行批360萬, 可否借足90% + 發展商的二按?

3. 你認為我應否儲多一年錢, 本金多些時先去買新樓? 如果要增加現金流, 買股票是否可行?

多謝你的意見.

answer:

讀者未有提，假設為單身。38歲半百萬在手3萬銀月入、都算一個典型的香港男士。正所謂呢刻餓唔死、但遠望前景睇唔到什麼好風光個隻。當然筆者不能幫讀者代答、只是為大眾港男之心態演繹。既然施老闆話佢人生第一次買樓係36歲，咁讀者而家拖到38歲，想趁發展商「幫」你借埋二按上會，買返一樓在手是否可行?

要知發展商提供的二按，是要符合一定的條件才能獲低息借貸，唯買新樓一簽已是必買必賣，繳付訂金後才「包借」的條件比想像中苛刻，到時要賠訂之餘更要補差價，50萬積蓄隨時「沒頂」。咁樣講到買樓好似太兇險，惟業權交易一事大家仍應努力去學習箇中細節，因樓房是在港穩定而又最有把握令人致富的法門，缺點係慢，最起碼都投放10年才有所成。若不想等那要考考自己有冇眼光買股賺錢、不過筆者在銀行工作一段時間，見到買股贏錢既人太少。

尤其資本少的，無坐貨能力、入場都是被宰殺多。有讀者問收息課程是否適合初學者? 客觀地介紹課程扼要 :  其中一部份會交待筆者建議之投資概念、解說香港人的投資心態為何被銀行及經紀扭曲、及講解有那些法門才是真正助人累富的。但說明一朝致富無可能、知自己位置而作出改善、用樓的良好抵押品因素加上債券保存勝果之功能、再依時在股票市場進取，究竟時機及資金分配應在何份額、這一一都在面授時講解。

筆者今年初在博文已叫大家留意新樓條款，在「應否買新樓收租?#799」提及:  呢個新盤即供可獲提供二按。息口都合理的，H+0.75%更有P-2.25封頂。留意要比$5000手續費。不少人簽約後先發覺文件未符財務機構標準，但礙於買新樓要攞discount好多時一簽就係正約，係必然要成交既前提下惟有使用發展商預早為你安排的”standby second mortgage loan”。 咁「窩心」既standby loan息口多少? 冇睇錯係P(Prime rate)，即約年息5%是也。用咁高息口去償還二按，計番幾年間比既利息其實同你平到既樓價都差唔多。

當然，每間新樓的條款都唔一樣。但而家用15萬就可以上車做招徠的、不其然令筆者想到專搵樓市新手蝦佢唔識唔問最尾被死焗供樓上會的故事。另外留意新樓呎價同二手樓在同區呎價貼近、但地點就肯定係二手樓多在已發展區域。經紀能「補飛」的、就係sell新樓周圍有基建、有發展潛力。係正確不過唔知買家幾時等到。30個月免息免供是否優惠? 最緊要其實睇30個月之後你間樓比而家平5%/10%定係另有睇法。現在長期樓花湧現、再一次重申: 樓市唔升唔代表佢跌，可以在+/- 10%之內橫行。就當上落夠20%，而家中原樓市指數跌20%都仲有120點、都係不少人未能負擔之價格。

至於讀者借唔借到錢? 這要看讀者本身職業、所提供文件才能決定。另外留意佢唔應該問借唔借到、係應該問「能否用低息借到錢買樓」。樓市新手遇上老練經紀加發展商、只好說少事多磨、筆者無謂阻人發達。