活在香港的求生術#944

http://homebloggerhk.com/37814/

諗sir,

你好！本人31歲，單身，在內地工作，月入RMB45,000(約HKD55,000)，有借貸，所以每月還款HKD1萬(至2017年1月)，現每月可以存款最多HKD2萬。由於早年揮霍，股市失利，只有基金加基金約30萬，儲蓄亦只有10萬。完全沒有方向，如果不靠父母幫助，如何有效地增加現金存款？有適合的投資方法？希望諗sir可以教路，盡快買到樓。

迷茫上

answer:

相信讀者財務情況反映了不少港人、三十之前有錢就洗，淨低就炒股。最尾發現「洗錢好過炒股」絕不為奇。因發覺食飯同睇戲至少係「洗左」係自己身上，買股如倒錢落海。其中亦有些人得出「投資無用既結論」，只花錢而淪為月光族。

做法過了火

有時在尖沙咀教室遇上些同學頗不修邊幅的，同意人不可以貌取，惟發現呢類同學很專心在股票投資，外表觀感少去打理。他們均覺得「投資是唯一出路」、專心鑽研。筆者看法是他們做法過了火，成幅身家拎去買股票希望一朝發達。其實股市專收叻仔，打工要贏只需同全公司幾百人鬥、炒股票要同全世界幾億人鬥。較好處理手法是，25歲前全輸無所謂，25之後每月儲起既錢一半存活期、一半作投資。勿讓投資失利打算個人買樓結婚之部署。

至於另一討論是:「人係唔係一定要買樓!?」先表達同意前輩曹仁超所言，收租對整個經濟是最沒幫助的行業。亦想指出中國歷朝崩壞之前、土地價值都會飛漲。什麼貨幣貶值同買唔到樓、其實在中國每朝皆現。今時在港經歷的不是新鮮事，只是每時代發展之循環當中之一節。自2010年起的辣招對阻止富豪作土地兼併有減慢之效，令炒賣土地的情況實有所舒緩。但若你相信事情蘊釀萬一過了拐點之後便無法停止，香港的地價長遠而言仍會在高水平、要生存在城市不好創作、只好買地(樓)。這樣看很悲觀，但亦是實情。所以正因如此、坊間出現了不少講移民既書。由於筆者在此範疇不熟悉，所以只好說說要留係度既話點去投資。

1000萬以上的財富高度是不屬於打工仔的

正所謂大富由天、小富由儉。對社會好又想搵錢一定係創業，但若你一心只想(又或被迫)做個打工仔、你的理財目標最好先架置在「每月唔返工都有糧出」過位置。敢講1000萬以上的財富高度是不屬於打工仔的，因為$30000*12*30 = 10,080,000。即你搵三萬銀一個月，成世唔食唔住都只可用30年儲到一千萬多少少。當然如你打工搵十萬銀一個月又另作別話，小眾討論，不妨另發電郵予筆者。要「唔返工都有糧出」，要有兩個朋友: 1.本金  2.回報

400萬係邊度黎先!?

若你的本金係400萬，而回報有7%一年，即一年收280,000，每月唔返工都有$23,333。

講到呢度當然會諗:「xxx, 400萬係邊度黎先!?」

明白一個人儲好難，所以，你應該搵多兩個租客同你儲。你認為每日睇下你隻股票升定跌易掌握定係問你個租客收租有把握? 好明顯筆者選後者，然後用原本睇股票既時間去同家人相處，又或同班中佬踢下波，試圖找回人真正應有的生活。至於一年7%之回報，在面授時再談，已是保守假設，當然要超22%一年亦先說是不可能。

或者你又再諗:「我有x首期呀?」其實，首次買樓只要付樓價一成作首期、次者兩成。當然用途基本上係自住。不過既然而家車都可同朋友共用，只要你稍有知識一定知點去規避風險。另外什麼收租煩又驚租霸，其實只要你見慣了，來來去去又咪係個幾個問題。筆者可傳授經驗、又或看倌可選擇自行去累積。很多時只要你用心去開展了事情，會發覺成件事無你想像中咁艱難。

講返買股票，後生同中年都應買，不過緊記係輔助而不是主要。即萬一輸股票、不會影響你到目的地的時間。贏就行快一點。不少人很熟練買股票落盤，但想問問各位買股前有冇睇清楚在港上市的規則呢? 踢波打聯賽都要先講明踢幾多分鐘同贏波有幾分啦，大家買左咁耐股票都唔睇下上市守則、亦不為股票之估值方法作了解，咪就方便左有些上市公司主席亂搬龍門去搵你銀攞。本篇不談方法、先講想法。希望幫到筆者自己同各位。